ਕਿਲਡੇਅਰ ਰੋਡ ਮੈਡੀਕਲ ਸੈਂਟਰ, ਜਿਸਨੂੰ KRMC ਵੀ ਕਿਹਾ ਜਾਂਦਾ ਹੈ, 36 ਕਿਲਡੇਅਰ ਰੋਡ, ਬਲੈਕਟਾਊਨ ਵਿਖੇ ਇੱਕ ਜਨਰਲ ਪ੍ਰੈਕਟਿਸ ਅਤੇ ਸਿਹਤ ਸੰਭਾਲ ਸਹੂਲਤ ਹੈ। ਇਹ ਕੇਂਦਰ 2010 ਤੋਂ ਬਲੈਕਟਾਊਨ ਭਾਈਚਾਰੇ ਦੀ ਸੇਵਾ ਕਰ ਰਿਹਾ ਹੈ। ਸੁਤੰਤਰ ਜਨਰਲ ਪ੍ਰੈਕਟੀਸ਼ਨਰ ਇਸ ਪ੍ਰੈਕਟਿਸ ਤੋਂ ਮਰੀਜ਼ਾਂ ਨੂੰ ਦੇਖਦੇ ਹਨ, ਜਿਨ੍ਹਾਂ ਨੂੰ KRMC ਦੀ ਨਰਸਿੰਗ, ਰਿਸੈਪਸ਼ਨ ਅਤੇ ਪ੍ਰਸ਼ਾਸਕੀ ਸਟਾਫ਼ ਵੱਲੋਂ ਸਹਾਇਤਾ ਦਿੱਤੀ ਜਾਂਦੀ ਹੈ। ਡਾਕਟਰੀ ਮਾਹਰ ਅਤੇ ਸਹਿਯੋਗੀ ਸਿਹਤ ਪੇਸ਼ੇਵਰ ਵੀ ਕੇਂਦਰ ਤੋਂ ਸੇਵਾਵਾਂ ਪ੍ਰਦਾਨ ਕਰਦੇ ਹਨ।

ਮਰੀਜ਼ ਆਪਣੀਆਂ ਰੋਜ਼ਾਨਾ ਸਿਹਤ ਸੰਬੰਧੀ ਚਿੰਤਾਵਾਂ, ਰੋਕਥਾਮ ਸੰਬੰਧੀ ਦੇਖਭਾਲ, ਚੱਲ ਰਹੀਆਂ ਬਿਮਾਰੀਆਂ, ਸਿਹਤ ਜਾਂਚ, ਟੀਕਾਕਰਨ, ਰੈਫ਼ਰਲ ਅਤੇ ਕੁਝ ਚੁਣੀਆਂ ਪ੍ਰਕਿਰਿਆਵਾਂ ਲਈ ਆ ਸਕਦੇ ਹਨ। ਬੱਚਿਆਂ, ਬਾਲਗਾਂ ਅਤੇ ਬਜ਼ੁਰਗਾਂ ਲਈ ਦੇਖਭਾਲ ਉਪਲਬਧ ਹੈ। ਕਈ ਸਲਾਹਕਾਰ ਡਾਕਟਰ ਅੰਗਰੇਜ਼ੀ ਤੋਂ ਇਲਾਵਾ ਹੋਰ ਭਾਸ਼ਾਵਾਂ ਬੋਲਦੇ ਹਨ। ਰਿਸੈਪਸ਼ਨ ਮਰੀਜ਼ਾਂ ਨੂੰ ਅਜਿਹੇ ਡਾਕਟਰ ਲੱਭਣ ਵਿੱਚ ਮਦਦ ਕਰ ਸਕਦੀ ਹੈ ਜੋ ਉਹਨਾਂ ਦੀ ਪਸੰਦੀਦਾ ਭਾਸ਼ਾ ਬੋਲਦਾ ਹੋਵੇ, ਬਸ਼ਰਤੇ ਡਾਕਟਰ ਉਪਲਬਧ ਹੋਵੇ।

KRMC ਦਾ ਉਦੇਸ਼ ਹੈ ਕਿ ਸਿਹਤ ਸੰਭਾਲ ਨੂੰ ਸਮਝਣਾ ਅਤੇ ਪ੍ਰਾਪਤ ਕਰਨਾ ਆਸਾਨ ਬਣਾਇਆ ਜਾਵੇ। ਮਰੀਜ਼ਾਂ ਨੂੰ ਉਤਸ਼ਾਹਿਤ ਕੀਤਾ ਜਾਂਦਾ ਹੈ ਕਿ ਸਵਾਲ ਪੁੱਛਣ ਅਤੇ ਡਾਕਟਰ ਨੂੰ ਅਜਿਹੀਆਂ ਸੱਭਿਆਚਾਰਕ, ਧਾਰਮਿਕ, ਪਰਿਵਾਰਕ ਜਾਂ ਗੱਲ-ਬਾਤ ਸੰਬੰਧੀ ਲੋੜਾਂ ਬਾਰੇ ਦੱਸਣ ਜੋ ਉਹਨਾਂ ਦੀ ਦੇਖਭਾਲ ਨੂੰ ਪ੍ਰਭਾਵਿਤ ਕਰ ਸਕਦੀਆਂ ਹਨ।

KRMC 36 ਕਿਲਡੇਅਰ ਰੋਡ, ਬਲੈਕਟਾਊਨ NSW 2148 ‘ਤੇ ਸਥਿਤ ਹੈ। ਇਹ ਬਲੈਕਟਾਊਨ ਟ੍ਰੇਨ ਸਟੇਸ਼ਨ ਅਤੇ ਵੈਸਟਪੁਆਇੰਟ ਸ਼ਾਪਿੰਗ ਸੈਂਟਰ ਤੋਂ ਛੋਟੀ ਜਿਹੀ ਪੈਦਲ ਦੀ ਦੂਰੀ ‘ਤੇ ਹੈ। ਕੇਂਦਰ ‘ਤੇ ਵਿਸ਼ੇਸ਼ ਲੋੜਾਂ ਵਾਲੇ ਲੋਕਾਂ ਦੀ ਪਾਰਕਿੰਗ ਸਮੇਤ, ਸਾਧਾਰਨ ਪਾਰਕਿੰਗ ਉਪਲਬਧ ਹੈ। ਨਜ਼ਦੀਕ ਹੋਰ ਪਾਰਕਿੰਗ ਉਪਲਬਧ ਹੈ, ਅਤੇ ਵੈਸਟਪੁਆਇੰਟ ਆਪਣੀਆਂ ਸ਼ਰਤਾਂ ਅਨੁਸਾਰ ਸੀਮਤ ਮੁਫ਼ਤ ਪਾਰਕਿੰਗ ਦੀ ਸਹੂਲਤ ਪ੍ਰਦਾਨ ਕਰਦਾ ਹੈ।

ਜਨਰਲ ਪ੍ਰੈਕਟਿਸ ਦੇ ਖੁਲ੍ਹਣ ਦਾ ਸਮਾਂ ਸੋਮਵਾਰ ਤੋਂ ਸ਼ੁੱਕਰਵਾਰ ਸਵੇਰੇ 8:00 ਵਜੇ ਤੋਂ ਸ਼ਾਮ 6:00 ਵਜੇ ਤੱਕ, ਅਤੇ ਹਫ਼ਤੇ ਦੇ ਅੰਤ (ਸ਼ਨੀ-ਐਤਵਾਰ) ਸਵੇਰੇ 8:00 ਵਜੇ ਤੋਂ ਦੁਪਹਿਰ 4:00 ਵਜੇ ਤੱਕ ਹੈ। ਜਨਰਲ ਪ੍ਰੈਕਟਿਸ ਸਰਕਾਰੀ ਛੁੱਟੀਆਂ ਵਾਲੇ ਦਿਨ ਬੰਦ ਰਹਿੰਦਾ ਹੈ। ਪੈਥੋਲੋਜੀ, ਫ਼ਾਰਮੇਸੀ, ਸਹਾਇਕ ਸਿਹਤ ਸੇਵਾਵਾਂ, ਰੇਡੀਓਲੋਜੀ ਅਤੇ ਵਿਸ਼ੇਸ਼ ਸੇਵਾਵਾਂ ਦੇ ਕੰਮ ਕਰਨ ਦੇ ਘੰਟੇ ਵੱਖੋ-ਵੱਖਰੇ ਹੋ ਸਕਦੇ ਹਨ। ਆਉਣ ਤੋਂ ਪਹਿਲਾਂ KRMC ਦੀ ਵੈੱਬਸਾਈਟ ਦੇਖ ਲਓ ਜਾਂ ਰਿਸੈਪਸ਼ਨ ਨਾਲ ਸੰਪਰਕ ਕਰੋ।

ਜੇ ਤੁਸੀਂ ਵ੍ਹੀਲਚੇਅਰ ਵਰਤਦੇ ਹੋ, ਤੁਰਨ-ਫਿਰਨ ਵਿਚ ਸਹਾਇਤਾ ਦੀ ਲੋੜ ਹੈ, ਸੁਣਨ ਜਾਂ ਦੇਖਣ ਸੰਬੰਧੀ ਖਾਸ ਲੋੜਾਂ ਹਨ ਜਾਂ ਗੱਲਬਾਤ ਕਰਨ ਲਈ ਵਾਧੂ ਸਮਾਂ ਚਾਹੀਦਾ ਹੈ ਤਾਂ ਬੁਕਿੰਗ ਕਰਦੇ ਸਮੇਂ ਰਿਸੈਪਸ਼ਨ ਨੂੰ ਦੱਸੋ।

ਅਪਾਇੰਟਮੈਂਟਾਂ HotDoc ਰਾਹੀਂ, (02) 8822 3000 ‘ਤੇ ਰਿਸੈਪਸ਼ਨ ਨੂੰ ਫ਼ੋਨ ਕਰਕੇ, ਜਾਂ ਕੇਂਦਰ ਵਿਖੇ ਆ ਕੇ ਬੁੱਕ ਕੀਤੀਆਂ ਜਾ ਸਕਦੀਆਂ ਹਨ। ਆਨਲਾਈਨ ਬੁਕਿੰਗ ਦਿਖਾਉਂਦੀ ਹੈ ਕਿ ਭਾਗ ਲੈਣ ਵਾਲੇ ਡਾਕਟਰ ਕਦੋਂ-ਕਦੋਂ  ਉਪਲਬਧ ਹਨ। ਜਦੋਂ ਸਹੀ ਮੁਲਾਕਾਤ ਦੀ ਕਿਸਮ ਸਪਸ਼ਟ ਨਾ ਹੋਵੇ ਜਾਂ ਸੇਵਾ ਆਨਲਾਈਨ ਸੂਚੀ ‘ਚ ਦਿਖਾਈ ਨਾ ਦੇਵੇ, ਤਾਂ ਰਿਸੈਪਸ਼ਨ ਨੂੰ ਫ਼ੋਨ ਕਰੋ।

ਜੇ ਬਹੁਤ ਸਾਰੇ ਮੁੱਦਿਆਂ, ਮਾਨਸਿਕ ਸਿਹਤ, ਸਿਹਤ ਮੁਲਾਂਕਣ, ਦਿਰਘਕਾਲੀਨ ਬਿਮਾਰੀ ਦੀ ਸਮੀਖਿਆ, ਕੰਮਕਾਜ ਸੰਬੰਧੀ ਮੈਡੀਕਲ ਜਾਂਚ, ਕਿਸੇ ਆਪ੍ਰੇਸ਼ਨ, ਫਾਰਮ ਜਾਂ ਰਿਪੋਰਟ ਲਈ ਮੁਲਾਕਾਤ ਕਰਨੀ ਹੈ ਤਾਂ ਰਿਸੈਪਸ਼ਨ ਨੂੰ ਦੱਸੋ। ਇੱਕ ਲੰਬੀ ਜਾਂ ਖਾਸ ਤੌਰ ‘ਤੇ ਤਿਆਰ ਕੀਤੀ ਮੁਲਾਕਾਤ ਦੀ ਲੋੜ ਹੋ ਸਕਦੀ ਹੈ। ਕੁਝ ਪ੍ਰਕਿਰਿਆਵਾਂ ਲਈ ਸ਼ੁਰੂਆਤੀ ਸਲਾਹ-ਮਸ਼ਵਰਾ ਲਾਜ਼ਮੀ ਹੁੰਦਾ ਹੈ।

ਆਹਮੋ-ਸਾਮ੍ਹਣੇ ਹੋਣ ਵਾਲੀ ਅਤੇ ਟੈਲੀਹੈਲਥ ਰਾਹੀਂ ਮੁਲਾਕਾਤਾਂ ਉਪਲਬਧ ਹੋ ਸਕਦੀਆਂ ਹਨ। ਐਮਰਜੈਂਸੀ ਸਥਿਤੀਆਂ ਜਾਂ ਜਦੋਂ ਜਾਂਚ, ਟੈਸਟ ਜਾਂ ਕਿਸੇ ਪ੍ਰਕਿਰਿਆ ਦੀ ਲੋੜ ਹੋਵੇ, ਤਾਂ ਇਨ੍ਹਾਂ ਲਈ ਟੈਲੀਹੈਲਥ ਉਚਿਤ ਨਹੀਂ ਹੈ। ਮੈਡੀਕੇਅਰ ਯੋਗਤਾ ਦੇ ਨਿਯਮ ਲਾਗੂ ਹੁੰਦੇ ਹਨ, ਅਤੇ ਨਿੱਜੀ ਫ਼ੀਸ ਦੇਣੀ ਪੈ ਸਕਦੀ ਹੈ। ਰਿਸੈਪਸ਼ਨ ਮੁਲਾਕਾਤ ਦੀ ਕਿਸਮ ਅਤੇ ਅੰਦਾਜ਼ੇ ਅਨੁਸਾਰ ਫ਼ੀਸ ਬਾਰੇ ਦੱਸ ਸਕਦੀ ਹੈ।

ਡਾਕਟਰ ਦੀ ਉਪਲਬਧਤਾ ਬਦਲ ਸਕਦੀ ਹੈ। ਤੁਰੰਤ ਧਿਆਨ ਦੇਣ ਯੋਗ ਮੈਡੀਕਲ ਸਮੱਸਿਆਵਾਂ ਲਈ ਈਮੇਲ, ਸੋਸ਼ਲ ਮੀਡੀਆ ਜਾਂ ਵੈੱਬਸਾਈਟ ਦੇ ਇਨਕੁਆਰੀ ਫਾਰਮ ਦੀ ਵਰਤੋਂ ਨਾ ਕਰੋ।

ਆਪਣਾ ਮੈਡੀਕੇਅਰ ਜਾਂ ਡਿਪਾਰਟਮੈਂਟ ਆਫ ਵੈਟਰਨਜ਼ ਅਫੇਅਰਜ਼ ਕਾਰਡ, ਕੋਈ ਵੀ ਰਿਆਇਤੀ ਕਾਰਡ, ਅਤੇ ਜੇ ਮੰਗਿਆ ਜਾਵੇ ਤਾਂ ਫੋਟੋ ਪਛਾਣ ਪੱਤਰ ਨਾਲ ਲਿਆਓ। ਨਵੇਂ ਮਰੀਜ਼ਾਂ ਨੂੰ ਚਾਹੀਦਾ ਹੈ ਕਿ ਰਜਿਸਟ੍ਰੇਸ਼ਨ ਅਤੇ ਸਹਿਮਤੀ ਦੀ ਜਾਣਕਾਰੀ ਪੂਰੀ ਕਰਨ ਲਈ ਜਲਦੀ ਆਉਣ। ਆਪਣੇ ਸੰਪਰਕ ਅਤੇ ਮੈਡੀਕੇਅਰ ਵੇਰਵੇ ਅੱਪ-ਟੂ-ਡੇਟ ਰੱਖੋ।

ਦਵਾਈਆਂ, ਵਿਟਾਮਿਨਾਂ ਅਤੇ ਸਪਲੀਮੈਂਟਾਂ ਦੀ ਮੌਜੂਦਾ ਸੂਚੀ, ਖੁਰਾਕਾਂ ਸਮੇਤ, ਨਾਲ ਲਿਆਓ। ਇਸਦੇ ਨਾਲ-ਨਾਲ ਸੰਬੰਧਤ ਹਸਪਤਾਲ ਜਾਂ ਮਾਹਿਰ ਦੇ ਪੱਤਰ, ਟੈਸਟ ਨਤੀਜੇ, ਇਮੇਜਿੰਗ ਰਿਪੋਰਟਾਂ, ਟੀਕਾਕਰਨ ਦੇ ਰਿਕਾਰਡ, ਰੋਜ਼ਗਾਰ ਦੇ ਦਸਤਾਵੇਜ਼ ਜਾਂ ਫਾਰਮ ਵੀ ਨਾਲ ਲਿਆਓ। ਮਾਪੇ ਬੱਚੇ ਦਾ ਸਿਹਤ ਰਿਕਾਰਡ ਲਿਆਉਣ ਦੀ ਚੋਣ ਕਰ ਸਕਦੇ ਹਨ। ਮਹੱਤਵਪੂਰਨ ਲੱਛਣ, ਉਹ ਕਦੋਂ ਸ਼ੁਰੂ ਹੋਏ ਅਤੇ ਆਪਣੇ ਸਵਾਲ ਲਿਖ ਲਓ।

ਡਾਕਟਰ ਨੂੰ ਆਪਣੀਆਂ ਐਲਰਜੀਆਂ, ਗਰਭ ਅਵਸਥਾ ਜਾਂ ਦੁੱਧ ਪਿਲਾਉਣ ਬਾਰੇ, ਹਾਲ ਹੀ ਵਿੱਚ ਹਸਪਤਾਲ ਵਿੱਚ ਮਿਲੀ ਦੇਖਭਾਲ, ਅਤੇ ਹੋਰ ਕਿਸੇ ਥਾਂ ਤੋਂ ਲਿਖੀਆਂ ਦਵਾਈਆਂ ਬਾਰੇ ਦੱਸੋ। ਉਚਿਤ ਕਲੀਨੀਕੀ ਸਲਾਹ ਤੋਂ ਬਿਨਾਂ ਦਵਾਈ ਨੂੰ ਨਾ ਰੋਕੋ ਨਾ ਬਦਲੋ।

ਜਿੱਥੇ ਉਚਿਤ ਹੋਵੇ, ਇੱਕ ਸਹਾਇਕ ਵਿਅਕਤੀ ਨਾਲ ਆ ਸਕਦਾ ਹੈ। ਸੰਵੇਦਨਸ਼ੀਲ ਚਰਚਾਵਾਂ ਲਈ, ਇੱਕ ਪੇਸ਼ੇਵਰ ਦੁਭਾਸ਼ੀਆ ਬਿਹਤਰ ਹੋ ਸਕਦਾ ਹੈ। ਬੱਚਿਆਂ ਨੂੰ ਜਟਿਲ ਜਾਂ ਨਿੱਜੀ ਸਿਹਤ ਜਾਣਕਾਰੀ ਦੀ ਵਿਆਖਿਆ ਨਹੀਂ ਕਰਨੀ ਚਾਹੀਦੀ।

ਸਾਫ਼-ਸਾਫ਼ ਕੀਤੀ ਗਈ ਗੱਲਬਾਤ ਸੁਰੱਖਿਅਤ ਸਿਹਤ ਸੰਭਾਲ ਨੂੰ ਸਹਾਰਾ ਦਿੰਦੀ ਹੈ। KRMC ਵਿੱਚ ਸਲਾਹ-ਮਸ਼ਵਰਾ ਦੇਣ ਵਾਲੇ ਕਈ ਜੀਪੀ ਇੱਕ ਤੋਂ ਵੱਧ ਭਾਸ਼ਾਵਾਂ ਬੋਲਦੇ ਹਨ। ਰਿਸੈਪਸ਼ਨ ਤੋਂ ਪੁੱਛੋ ਕਿ ਕਿਹੜੇ ਡਾਕਟਰ ਤੁਹਾਡੀ ਪਸੰਦੀਦਾ ਭਾਸ਼ਾ ਬੋਲਦੇ ਹਨ ਅਤੇ ਕੀ ਕੋਈ ਅਪਾਇੰਟਮੈਂਟ ਉਪਲਬਧ ਹੈ। ਭਾਸ਼ਾਈ ਹੁਨਰ ਅਤੇ ਉਪਲਬਧਤਾ ਦੀ ਪੁਸ਼ਟੀ ਬੁਕਿੰਗ ਕਰਦੇ ਸਮੇਂ ਕੀਤੀ ਜਾਣੀ ਚਾਹੀਦੀ ਹੈ।

ਜੇ ਤੁਹਾਨੂੰ ਦੁਭਾਸ਼ੀਏ ਜਾਂ ਸੰਚਾਰ ਸੰਬੰਧੀ ਕਿਸੇ ਹੋਰ ਸੁਵਿਧਾ ਦੀ ਲੋੜ ਹੈ, ਤਾਂ ਰਿਸੈਪਸ਼ਨ ਨੂੰ ਪਹਿਲਾਂ ਦੱਸੋ। ਅਨੁਵਾਦਕ ਦੀਆਂ ਵਿਵਸਥਾਵਾਂ ਆਪਣੇ ਆਪ ਨਹੀਂ ਹੁੰਦੀਆਂ ਅਤੇ ਇਹਨਾਂ ਦੀ ਪੁਸ਼ਟੀ ਪਹਿਲਾਂ ਤੋਂ ਕਰਨੀ ਲਾਜ਼ਮੀ ਹੈ। ਇੱਕ ਪੇਸ਼ੇਵਰ ਦੁਭਾਸ਼ੀਆ ਦਰੁਸਤ ਗੱਲਬਾਤ ਅਤੇ ਨਿੱਜਤਾ ਨੂੰ ਯਕੀਨੀ ਬਣਾਉਣ ਵਿੱਚ ਸਹਾਇਤਾ ਕਰ ਸਕਦਾ ਹੈ। ਇੱਕ ਭਰੋਸੇਯੋਗ ਸਹਾਇਕ ਵਿਅਕਤੀ ਵੀ, ਸਹਿਮਤੀ ਅਤੇ ਕਲੀਨਿਕਲ ਹਾਲਾਤਾਂ ਨੂੰ ਧਿਆਨ ‘ਚ ਰੱਖਦੇ ਹੋਏ, ਹਾਜ਼ਰ ਹੋ ਸਕਦਾ ਹੈ।

ਜੇ ਕੁਝ ਵੀ ਸਮਝ ਵਿੱਚ ਨਾ ਆਵੇ, ਤਾਂ ਡਾਕਟਰ ਨੂੰ ਉਹ ਗੱਲ ਦੁਹਰਾਉਣ, ਸਮਝਾਉਣ ਜਾਂ ਲਿਖ ਕੇ ਦੇਣ ਲਈ ਕਹੋ। ਜਾਣ ਤੋਂ ਪਹਿਲਾਂ, ਇਹ ਯਕੀਨੀ ਬਣਾਓ ਕਿ ਤੁਸੀਂ ਅਗਲਾ ਕਦਮ ਸਮਝਦੇ ਹੋ, ਜਿਵੇਂ ਕਿ ਕੋਈ ਟੈਸਟ, ਦਵਾਈ, ਰੈਫਰਲ, ਫਾਲੋ-ਅੱਪ ਜਾਂ ਤੁਰੰਤ ਸਮੀਖਿਆ।

KRMC ਵਿੱਚ ਬਹੁਤ ਸਾਰੀਆਂ ਮੈਡੀਕੇਅਰ-ਯੋਗ ਜੀਪੀ ਸਲਾਹ-ਮਸ਼ਵਰੇ ਬਲਕ ਬਿਲ (ਮੈਡੀਕੇਅਰ ਦੁਆਰਾ ਕਵਰ) ਕੀਤੇ ਜਾਂਦੇ ਹਨ। ਜਦੋਂ ਕੋਈ ਸੇਵਾ ਬਲਕ ਬਿਲ ਕੀਤੀ ਜਾਂਦੀ ਹੈ, ਤਾਂ ਸਿਹਤ ਪੇਸ਼ੇਵਰ ਸਿੱਧਾ ਮੈਡੀਕੇਅਰ ਨੂੰ ਬਿੱਲ ਭੇਜਦਾ ਹੈ ਅਤੇ ਮਰੀਜ਼ ਨੂੰ ਉਸ ਸੇਵਾ ਲਈ ਆਪਣੀ ਜੇਬ ਵਿੱਚੋਂ ਕੋਈ ਖਰਚਾ ਨਹੀਂ ਕਰਨਾ ਪੈਂਦਾ।

ਫੀਸਾਂ ਉਹਨਾਂ ਸੇਵਾਵਾਂ ‘ਤੇ ਲਾਗੂ ਹੋ ਸਕਦੀਆਂ ਹਨ ਜੋ ਮੈਡੀਕੇਅਰ ਦੁਆਰਾ ਕਵਰ ਨਹੀਂ ਕੀਤੀਆਂ ਜਾਂਦੀਆਂ, ਮੈਡੀਕੇਅਰ ਯੋਗਤਾ ਦੀਆਂ ਲੋੜਾਂ ਨੂੰ ਪੂਰਾ ਨਹੀਂ ਕਰਦੀਆਂ, ਜਾਂ ਜਿਨ੍ਹਾਂ ਵਿੱਚ ਵਾਧੂ ਖਰਚੇ ਸ਼ਾਮਲ ਹੁੰਦੇ ਹਨ। ਉਦਾਹਰਨਾਂ ਵਿੱਚ ਕੁਝ ਪ੍ਰਕਿਰਿਆਵਾਂ, ਡ੍ਰੈਸਿੰਗ (ਮਰਹਮ-ਪੱਟੀ), ਟੀਕੇ, ਮੈਡੀਕਲ ਰਿਪੋਰਟਾਂ, ਫਾਰਮ, ਰੋਜ਼ਗਾਰ ਸੰਬੰਧੀ ਮੈਡੀਕਲ ਜਾਂਚਾਂ, ਨਿੱਜੀ ਸਲਾਹ-ਮਸ਼ਵਰੇ, ਵੈਧ ਮੈਡੀਕੇਅਰ ਕਾਰਡ ਨਾ ਰੱਖਣ ਵਾਲੇ ਮਰੀਜ਼ਾਂ ਲਈ ਸੇਵਾਵਾਂ, ਅਤੇ ਕੁਝ ਡਾਕਟਰੀ ਮਾਹਰਾਂ ਜਾਂ ਸਹਿਯੋਗੀ ਸਿਹਤ ਨਿਯੁਕਤੀਆਂ ਸ਼ਾਮਲ ਹੋ ਸਕਦੀਆਂ ਹਨ। ਪੈਥੋਲੋਜੀ, ਰੇਡੀਓਲੋਜੀ, ਫਾਰਮੇਸੀ ਅਤੇ ਹੋਰ ਪ੍ਰਦਾਤਾ ਆਪਣੇ ਬਿਲਿੰਗ ਸ਼ਰਤਾਂ ਖੁਦ ਨਿਰਧਾਰਤ ਜਾਂ ਲਾਗੂ ਕਰਦੇ ਹਨ।

ਅਪਾਇੰਟਮੈਂਟ ਜਾਂ ਪ੍ਰਕਿਰਿਆ ਤੋਂ ਪਹਿਲਾਂ ਸੰਭਾਵਿਤ ਫੀਸਾਂ ਬਾਰੇ ਰਿਸੈਪਸ਼ਨ ਤੋਂ ਪੁੱਛੋ। ਅੰਤ ਵਿੱਚ ਤੁਸੀਂ ਕੀ ਸੇਵਾ ਲੈਂਦੇ ਹੋ ਅਤੇ ਉਸਦੀ ਫੀਸ ਕਲੀਨੀਕੀ ਮੁਲਾਂਕਣ ਅਤੇ ਲੋੜੀਂਦੀਆਂ ਚੀਜ਼ਾਂ ‘ਤੇ ਨਿਰਭਰ ਕਰ ਸਕਦੀ ਹੈ। ਮੈਡੀਕੇਅਰ ਯੋਗਤਾ, ਬਲਕ ਬਿਲਿੰਗ, ਰੀਬੇਟਾਂ ਅਤੇ ਜੇਬੋਂ ਖਰਚੇ ਬਦਲ ਸਕਦੇ ਹਨ।

ਇੱਕ ਜਨਰਲ ਪ੍ਰੈਕਟੀਸ਼ਨਰ, ਜਾਂ ਜੀਪੀ, ਡਾਕਟਰ ਹੁੰਦਾ ਹੈ ਜੋ ਪਹਿਲਾ ਸੰਪਰਕ ਅਤੇ ਅੱਗੇ ਦੀ ਦੇਖਭਾਲ ਪ੍ਰਦਾਨ ਕਰਦਾ ਹੈ। ਜੀਪੀ ਲੱਛਣਾਂ ਦਾ ਮੁਲਾਂਕਣ ਕਰ ਸਕਦਾ ਹੈ, ਕਈ ਬਿਮਾਰੀਆਂ ਦਾ ਦਾ ਇਲਾਜ ਕਰ ਸਕਦਾ ਹੈ, ਜਦੋਂ ਢੁਕਵਾਂ ਹੋਵੇ ਤਾਂ ਦਵਾਈਆਂ ਲਿਖ ਸਕਦਾ ਹੈ, ਟੈਸਟਾਂ ਲਈ ਬੇਨਤੀ ਕਰ ਸਕਦਾ ਹੈ ਅਤੇ ਮਰੀਜ਼ ਨੂੰ ਰੈਫਰ ਕਰ ਸਕਦਾ ਹੈ।

ਰੇਫਰਲ ਇੱਕ ਪੱਤਰ ਜਾਂ ਇਲੈਕਟ੍ਰਾਨਿਕ ਬੇਨਤੀ ਹੁੰਦੀ ਹੈ ਜੋ ਕਿਸੇ ਮਾਹਿਰ ਜਾਂ ਹੋਰ ਸੇਵਾ ਲਈ ਭੇਜੀ ਜਾਂਦੀ ਹੈ। ਕੁਝ ਸੇਵਾਵਾਂ ਲਈ ਅਪਾਇੰਟਮੈਂਟ ਜਾਂ ਮੈਡੀਕੇਅਰ ਰਿਬੇਟ ਤੋਂ ਪਹਿਲਾਂ ਇੱਕ ਵੈਧ ਰੈਫਰਲ ਦੀ ਲੋੜ ਹੁੰਦੀ ਹੈ। ਰੇਫਰਲਾਂ ਦੀ ਮਿਆਦ ਖਤਮ ਹੋ ਸਕਦੀ ਹੈ।

ਪੈਥੋਲੋਜੀ ਦਾ ਮਤਲਬ ਲੈਬੋਰਟ੍ਰੀ ਜਾਂਚ ਹੈ, ਜਿਵੇਂ ਕਿ ਖੂਨ, ਪਿਸ਼ਾਬ ਜਾਂ ਸਵੈਬ ਟੈਸਟ। ਰੇਡੀਓਲੋਜੀ ਜਾਂ ਮੈਡੀਕਲ ਇਮੇਜਿੰਗ ਵਿੱਚ ਐਕਸ-ਰੇ, ਅਲਟਰਾਸਾਊਂਡ ਅਤੇ ਹੋਰ ਸਕੈਨ ਸ਼ਾਮਲ ਹਨ। ਆਮ ਤੌਰ ‘ਤੇ ਇੱਕ ਬੇਨਤੀ ਫਾਰਮ ਦੀ ਲੋੜ ਹੁੰਦੀ ਹੈ, ਅਤੇ ਜਿਸ ਵਿਅਕਤੀ ਨੇ ਟੈਸਟ ਦਾ ਆਰਡਰ ਦਿੱਤਾ ਹੁੰਦਾ ਹੈ, ਉਹ ਆਮ ਤੌਰ ‘ਤੇ ਨਤੀਜਾ ਪ੍ਰਾਪਤ ਕਰਦਾ ਹੈ।

ਸਹਿਯੋਗੀ ਸਿਹਤ ਪੇਸ਼ੇਵਰਾਂ ਵਿੱਚ ਫਿਜ਼ੀਓਥੈਰੇਪਿਸਟ ਅਤੇ ਹੋਰ ਅਭਿਆਸੀ ਸ਼ਾਮਲ ਹੁੰਦੇ ਹਨ ਜੋ ਹਿੱਲ-ਜੁੱਲ, ਸੁਧਾਰ, ਪੋਸ਼ਣ ਜਾਂ ਰੋਜ਼ਾਨਾ ਕੰਮਕਾਜ ਸਮਰੱਥਾ ਵਿੱਚ ਸਹਾਇਤਾ ਕਰਦੇ ਹਨ। ਮਾਹਿਰ (ਸਪੈਸ਼ਲਿਸਟ) ਇੱਕ ਡਾਕਟਰ ਹੁੰਦਾ ਹੈ ਜਿਸਨੇ ਕਿਸੇ ਖਾਸ ਖੇਤਰ ਵਿੱਚ ਉੱਚ ਪੱਧਰੀ ਸਿਖਲਾਈ ਪ੍ਰਾਪਤ ਕੀਤੀ ਹੁੰਦੀ ਹੈ। ਉਹਨਾਂ ਦੀਆਂ ਫੀਸਾਂ ਜੀਪੀ ਬਿਲਿੰਗ ਤੋਂ ਵੱਖਰੀਆਂ ਹਨ।

ਪ੍ਰਿਸਕ੍ਰਿਪਸ਼ਨ ਦਵਾਈ ਨੂੰ ਅਧਿਕਾਰਤ ਕਰਦਾ ਹੈ। ਦਵਾਈ ਦੁਹਰਾਉਣ ਲਈ ਵੀ ਸੁਰੱਖਿਆ ਅਤੇ ਨਿਗਰਾਨੀ ਦੀ ਸਮੀਖਿਆ ਕਰਕੇ ਸਲਾਹ-ਮਸ਼ਵਰੇ ਦੀ ਲੋੜ ਪੈ ਸਕਦੀ ਹੈ। ਉਚਿਤ ਸਥਿਤੀ ਵਿੱਚ ਟੈਲੀਹੈਲਥ ਫੋਨ ਜਾਂ ਵੀਡੀਓ ਰਾਹੀਂ ਕੀਤੀ ਜਾਣ ਵਾਲਾ ਸਲਾਹ-ਮਸ਼ਵਰਾ ਹੁੰਦਾ ਹੈ।

MyMedicare ਆਸਟ੍ਰੇਲੀਆ ਦੀ ਸਵੈਛਿਕ ਮਰੀਜ਼ ਰਜਿਸਟ੍ਰੇਸ਼ਨ ਪ੍ਰਣਾਲੀ ਹੈ। ਮਰੀਜ਼ ਇੱਕ ਪਸੰਦੀਦਾ ਪ੍ਰੈਕਟਿਸ ਨਾਲ ਰਜਿਸਟਰ ਕਰ ਸਕਦਾ ਹੈ ਅਤੇ ਇੱਕ ਪਸੰਦੀਦਾ ਜੀਪੀ ਦੀ ਨਾਮਜ਼ਦਗੀ ਕਰ ਸਕਦਾ ਹੈ।

ਜੀਪੀ ਨਵੇਂ ਲੱਛਣਾਂ ਦਾ ਮੁਲਾਂਕਣ ਕਰ ਸਕਦਾ ਹੈ ਅਤੇ ਚੱਲ ਰਹੀਆਂ ਸਿਹਤ ਚਿੰਤਾਵਾਂ ਦਾ ਪ੍ਰਬੰਧਨ ਕਰਨ ਵਿੱਚ ਮਦਦ ਕਰ ਸਕਦਾ ਹੈ। ਮਿਲਣ ਦੇ ਕਾਰਨਾਂ ਵਿੱਚ ਬੁਖਾਰ, ਖੰਘ, ਸੰਕ੍ਰਮਣ, ਦਰਦ, ਸਿਰਦਰਦ, ਪੇਟ ਜਾਂ ਆਂਤਾਂ ਦੇ ਲੱਛਣ, ਛੋਟੀਆਂ ਸੱਟਾਂ, ਚਮੜੀ ਸੰਬੰਧੀ ਸਮੱਸਿਆਵਾਂ, ਨੀਂਦ ਦੀਆਂ ਸਮੱਸਿਆਵਾਂ, ਦਵਾਈਆਂ ਬਾਰੇ ਸਵਾਲ, ਯੌਨ ਸਿਹਤ ਸੰਬੰਧੀ ਚਿੰਤਾਵਾਂ, ਮੈਡੀਕਲ ਸਰਟੀਫਿਕੇਟ ਅਤੇ ਹਸਪਤਾਲ ਤੋਂ ਬਾਅਦ ਦੇ ਫਾਲੋ-ਅਪ ਸ਼ਾਮਿਲ ਹੋ ਸਕਦੇ ਹਨ।

ਡਾਕਟਰ ਮਰੀਜ਼ ਦੇ ਲੱਛਣਾਂ, ਮੈਡੀਕਲ ਇਤਿਹਾਸ, ਦਵਾਈਆਂ, ਜਾਂਚ ਦੇ ਨਤੀਜਿਆਂ ਅਤੇ ਕਲੀਨੀਕੀ ਜ਼ਰੂਰਤਾਂ ਨੂੰ ਧਿਆਨ ਵਿੱਚ ਰੱਖੇਗਾ। ਡਾਕਟਰ ਸਵੈ-ਦੇਖਭਾਲ, ਨਿਗਰਾਨੀ, ਨੁਸਖਾ, ਪੈਥੋਲੋਜੀ, ਇਮੇਜਿੰਗ, ਕੋਈ ਆਪ੍ਰੇਸ਼ਨ, ਰੈਫਰਲ ਜਾਂ ਫਾਲੋ-ਅਪ ਮੁਲਾਕਾਤ ਦੀ ਸਿਫਾਰਸ਼ ਕਰ ਸਕਦਾ ਹੈ। ਟੈਸਟ, ਨੁਸਖੇ, ਰੈਫਰਲ ਅਤੇ ਇਲਾਜ ਆਪਣੇ ਆਪ ਨਹੀਂ ਹੁੰਦੇ; ਇਹ ਵਿਅਕਤੀਗਤ ਮੁਲਾਂਕਣ ਅਤੇ ਕਲੀਨਿਕਲ ਯੋਗਤਾ ‘ਤੇ ਨਿਰਭਰ ਕਰਦੇ ਹਨ।

ਜਦੋਂ ਕਈ ਅਣਸੰਬੰਧਿਤ ਮੁੱਦਿਆਂ ‘ਤੇ ਚਰਚਾ ਕਰਨ ਦੀ ਲੋੜ ਹੋਵੇ, ਤਾਂ ਲੰਬੀ ਮੁਲਾਕਾਤ ਬੁੱਕ ਕਰੋ। ਨਵੇਂ ਗੰਭੀਰ ਲੱਛਣਾਂ ਲਈ ਰੁਟੀਨ ਮੁਲਾਕਾਤ ਦੀ ਬਜਾਏ ਤੁਰੰਤ ਜਾਂ ਐਮਰਜੈਂਸੀ ਦੇਖਭਾਲ ਦੀ ਲੋੜ ਪੈ ਸਕਦੀ ਹੈ।

ਸਲਾਹਕਾਰ ਜੀਪੀ ਬੱਚਿਆਂ, ਨਿਆਣਿਆਂ ਅਤੇ ਕਿਸ਼ੋਰਾਂ ਦੀ ਦੇਖਭਾਲ ਕਰ ਸਕਦੇ ਹਨ। ਨਿਯੁਕਤੀਆਂ ਛੋਟੀਆਂ-ਮੋਟੀਆਂ ਬਿਮਾਰੀਆਂ, ਵਧਣ-ਫੁੱਲਣ ਅਤੇ ਵਿਕਾਸ ਸੰਬੰਧੀ, ਟੀਕਾਕਰਨ, ਦਮਾ, ਐਲਰਜੀਆਂ, ਚਮੜੀ ਦੀਆਂ ਸਥਿਤੀਆਂ, ਨੀਂਦ, ਵਿਹਾਰ, ਸਕੂਲ ਸੰਬੰਧੀ ਚਿੰਤਾਵਾਂ, ਰੋਕਥਾਮਕ ਦੇਖਭਾਲ ਅਤੇ ਕਿਸ਼ੋਰਾਂ ਦੀ ਭਲਾਈ ਨਾਲ ਸਬੰਧਤ ਹੋ ਸਕਦੀਆਂ ਹਨ।

ਸਕੂਲ, ਹਸਪਤਾਲ ਜਾਂ ਹੋਰ ਡਾਕਟਰੀ ਸੇਵਾ ਪ੍ਰਦਾਤਾਵਾਂ ਤੋਂ ਸੰਬੰਧਤ ਸਿਹਤ ਰਿਕਾਰਡ, ਦਵਾਈਆਂ ਅਤੇ ਜਾਣਕਾਰੀ ਆਪਣੇ ਨਾਲ ਲਿਆਓ। ਜੇ ਕਈ ਚਿੰਤਾਵਾਂ ਜਾਂ ਵਿਕਾਸ ਮੁਲਾਂਕਣ ਬਾਰੇ ਚਰਚਾ ਕਰਨ ਦੀ ਲੋੜ ਹੋਵੇ ਤਾਂ ਰਿਸੈਪਸ਼ਨ ਨੂੰ ਦੱਸੋ, ਤਾਂ ਜੋ ਉਚਿਤ ਸਮਾਂ ਮੁਹੱਈਆ ਕੀਤਾ ਜਾ ਸਕੇ।

ਜਵਾਨ ਲੋਕ ਕਈ ਵਾਰ ਆਪਣੀ ਉਮਰ, ਸਮਝ ਅਤੇ ਕਲੀਨੀਕੀ ਹਾਲਾਤਾਂ ਦੇ ਅਨੁਸਾਰ ਡਾਕਟਰ ਨਾਲ ਨਿੱਜੀ ਤੌਰ ‘ਤੇ ਗੱਲ ਕਰ ਸਕਦੇ ਹਨ। ਡਾਕਟਰ ਗੁਪਤਤਾ ਬਾਰੇ ਸਮਝਾਏਗਾ ਅਤੇ ਦੱਸੇਗਾ ਕਿ ਸੁਰੱਖਿਆ ਜਾਂ ਕਾਨੂੰਨੀ ਕਾਰਨਾਂ ਕਰਕੇ ਕਦੋਂ ਜਾਣਕਾਰੀ ਸਾਂਝੀ ਕਰਨ ਦੀ ਲੋੜ ਪੈ ਸਕਦੀ ਹੈ। ਜਦੋਂ ਬੱਚਾ ਬਹੁਤ ਬਿਮਾਰ ਹੋਵੇ, ਸਾਹ ਲੈਣ ਵਿੱਚ ਮੁਸ਼ਕਲ ਹੋਵੇ, ਅਸਧਾਰਣ ਤੌਰ ‘ਤੇ ਸੁਸਤ ਹੋਵੇ ਜਾਂ ਹੋਰ ਗੰਭੀਰ ਲੱਛਣ ਦਿਖਾਵੇ, ਤਾਂ ਮਾਪੇ ਜਾਂ ਸਰਪ੍ਰਸਤ ਨੂੰ ਤੁਰੰਤ ਡਾਕਟਰੀ ਸਹਾਇਤਾ ਲੈਣੀ ਚਾਹੀਦੀ ਹੈ।

ਔਰਤਾਂ ਮਾਹਵਾਰੀ ਸੰਬੰਧੀ ਚਿੰਤਾਵਾਂ, ਗਰਭਨਿਰੋਧ, ਸਰਵਾਈਕਲ ਸਕ੍ਰੀਨਿੰਗ, ਛਾਤੀ ਸੰਬੰਧੀ ਚਿੰਤਾਵਾਂ, ਉਪਜਾਊਤਾ (fertility) ਅਤੇ ਗਰਭ ਧਾਰਨ ਤੋਂ ਪਹਿਲਾਂ ਦੀ ਦੇਖਭਾਲ, ਗਰਭ ਅਵਸਥਾ ਸੰਬੰਧੀ ਦੇਖਭਾਲ, ਜਣੇਪੇ ਤੋਂ ਬਾਅਦ ਦੀ ਸਿਹਤ, ਰਜੋਨਿਵ੍ਰਿਤੀ (menopause), ਯੌਨ ਸਿਹਤ, ਮਾਨਸਿਕ ਸਿਹਤ ਅਤੇ ਰੋਕਥਾਮਕ ਜਾਂਚਾਂ ਲਈ ਜਨਰਲ ਪ੍ਰੈਕਟਿਸ ਦੀਆਂ ਅਪਾਇੰਟਮੈਂਟਾਂ ਬੁੱਕ ਕਰ ਸਕਦੀਆਂ ਹਨ। ਉਪਲਬਧਤਾ ਦੇ ਅਧਾਰ ‘ਤੇ ਮਰੀਜ਼ ਕਿਸੇ ਮਹਿਲਾ ਜੀਪੀ ਲਈ ਬੇਨਤੀ ਕਰ ਸਕਦੇ ਹਨ।

ਕੁਝ ਸਲਾਹਕਾਰ ਡਾਕਟਰਾਂ ਨੇ ਔਰਤਾਂ ਦੀ ਸਿਹਤ ਵਿੱਚ ਵਾਧੂ ਤਾਲੀਮ ਜਾਂ ਦਿਲਚਸਪੀ ਲਈ ਹੈ। ਚੁਣੇ ਹੋਏ ਡਾਕਟਰ ਗਰਭ-ਨਿਰੋਧਕ ਇੰਪਲਾਂਟ ਜਾਂ ਇੰਟਰਾਯੂਟੇਰਾਈਨ (intrauterine) ਉਪਕਰਣ ਸੇਵਾਵਾਂ, ਜਿਵੇਂ ਕਿ ਮੁਲਾਂਕਣ, ਉਨ੍ਹਾਂ ਨੂੰ ਲਗਾਉਣਾ ਜਾਂ ਹਟਾਉਣ  ਸੰਬੰਧੀ ਸੇਵਾਵਾਂ ਪ੍ਰਦਾਨ ਕਰ ਸਕਦੇ ਹਨ। ਇਹਨਾਂ ਪ੍ਰਕਿਰਿਆਵਾਂ ਲਈ ਇੱਕ ਉਚਿਤ ਅਪਪੋਇੰਟਮੈਂਟ ਦੀ ਲੋੜ ਹੁੰਦੀ ਹੈ ਅਤੇ ਸ਼ਾਇਦ ਇੱਕ ਸ਼ੁਰੂਆਤੀ ਸਲਾਹ-ਮਸ਼ਵਰੇ ਦੀ ਵੀ ਲੋੜ ਪੈ ਸਕਦੀ ਹੈ। ਬੁਕਿੰਗ ਕਰਨ ਤੋਂ ਪਹਿਲਾਂ ਉਪਲਬਧਤਾ, ਕਲੀਨਿਕਲ ਯੋਗਤਾ ਅਤੇ ਫੀਸਾਂ ਦੀ ਪੁਸ਼ਟੀ ਕਰ ਲਓ।

ਸਲਾਹ-ਮਸ਼ਵਰਾ ਕਾਨੂੰਨੀ ਅਤੇ ਸੁਰੱਖਿਆ ਦੀਆਂ ਲੋੜਾਂ ਅਨੁਸਾਰ ਗੁਪਤ ਰੱਖਿਆ ਜਾਂਦਾ ਹੈ। ਡਾਕਟਰ ਨੂੰ ਸੰਬੰਧਤ ਦਵਾਈਆਂ, ਐਲਰਜੀਆਂ, ਗਰਭਧਾਰਣ, ਦੁੱਧ ਪਿਲਾਉਣ ਅਤੇ ਪਿਛਲੇ ਇਲਾਜਾਂ ਬਾਰੇ ਦੱਸੋ। ਡਾਕਟਰ ਵਿਅਕਤੀਗਤ ਸਥਿਤੀ ਦਾ ਮੁਲਾਂਕਣ ਕਰਨ ਤੋਂ ਬਾਅਦ ਜਾਂਚ, ਟੈਸਟ, ਇਮੇਜਿੰਗ, ਇਲਾਜ, ਫਾਲੋ-ਅਪ ਜਾਂ ਰੈਫਰਲ ਦੀ ਸਿਫਾਰਸ਼ ਕਰ ਸਕਦਾ ਹੈ।

ਮਰਦ GP ਆਮ ਸਿਹਤ, ਬਲੱਡ ਪ੍ਰੈਸ਼ਰ, ਡਾਇਬਟੀਜ਼ ਦਾ ਖਤਰਾ, ਦਿਲ ਦੀ ਸਿਹਤ, ਵਜ਼ਨ, ਨੀਂਦ, ਮਾਨਸਿਕ ਸਿਹਤ, ਸਿਗਰਟਨੋਸ਼ੀ, ਸ਼ਰਾਬ ਦੀ ਵਰਤੋਂ, ਯੌਨ ਸਿਹਤ, ਉਪਜਾਊਤਾ, ਪਿਸ਼ਾਬ ਸੰਬੰਧੀ ਲੱਛਣ, ਪ੍ਰੋਸਟੇਟ ਸੰਬੰਧੀ ਚਿੰਤਾਵਾਂ, ਚਮੜੀ ਵਿੱਚ ਤਬਦੀਲੀਆਂ ਅਤੇ ਲੰਬੇ ਸਮੇਂ ਦੀਆਂ ਬਿਮਾਰੀਆਂ ਬਾਰੇ ਸਲਾਹ-ਮਸ਼ਵਰਾ ਕਰ ਸਕਦੇ ਹਨ।

ਕੁਝ ਸਿਹਤ ਸੰਬੰਧੀ ਚਿੰਤਾਵਾਂ ਨਿੱਜੀ ਮਹਿਸੂਸ ਹੋ ਸਕਦੀਆਂ ਹਨ ਜਾਂ ਉਨ੍ਹਾਂ ਬਾਰੇ ਗੱਲ ਕਰਨਾ ਔਖਾ ਹੋ ਸਕਦਾ ਹੈ। ਜੀਪੀ ਸਲਾਹ-ਮਸ਼ਵਰੇ ਕਾਨੂੰਨੀ ਅਤੇ ਸੁਰੱਖਿਆ ਦੀਆਂ ਲੋੜਾਂ ਅਨੁਸਾਰ ਗੁਪਤ ਰੱਖੇ ਜਾਂਦੇ ਹਨ। ਸਹੀ ਜਾਣਕਾਰੀ ਦੇਣ ਨਾਲ ਡਾਕਟਰ ਨੂੰ ਜੋਖਮ ਦਾ ਅੰਦਾਜ਼ਾ ਲਗਾਉਣ ਅਤੇ ਉਚਿਤ ਵਿਕਲਪਾਂ ਬਾਰੇ ਚਰਚਾ ਕਰਨ ਵਿੱਚ ਮਦਦ ਮਿਲਦੀ ਹੈ। ਜਾਂਚ ਵਿੱਚ ਉਮਰ, ਲੱਛਣਾਂ, ਪਰਿਵਾਰਕ ਇਤਿਹਾਸ ਅਤੇ ਹੋਰ ਜੋਖਮ ਕਾਰਕਾਂ ਦੇ ਆਧਾਰ ‘ਤੇ ਸਵਾਲ, ਜਾਂਚ ਜਾਂ ਟੈਸਟ ਸ਼ਾਮਲ ਹੋ ਸਕਦੇ ਹਨ। ਸਕ੍ਰੀਨਿੰਗ ਅਤੇ ਇਲਾਜ ਵਿਅਕਤੀਗਤ ਕਲੀਨਿਕਲ ਲੋੜਾਂ ਦੇ ਅਨੁਸਾਰ ਸਿਫਾਰਸ਼ ਕੀਤੇ ਜਾਂਦੇ ਹਨ, ਨਾ ਕਿ ਹਰ ਵਿਅਕਤੀ ਲਈ ਇੱਕ ਮਿਆਰੀ ਪੈਕੇਜ ਦੇ ਤੌਰ ‘ਤੇ।

ਦਿਰਘਕਾਲੀਕ ਸਥਿਤੀ ਇੱਕ ਸਿਹਤ ਸਮੱਸਿਆ ਹੈ ਜੋ ਲੰਬੇ ਸਮੇਂ ਤੱਕ ਰਹਿੰਦੀ ਹੈ ਅਤੇ ਇਸਨੂੰ ਨਿਯਮਤ ਨਿਗਰਾਨੀ ਦੀ ਲੋੜ ਹੋ ਸਕਦੀ ਹੈ। ਉਦਾਹਰਨਾਂ ਵਿੱਚ ਸ਼ੂਗਰ, ਉੱਚ ਰਕਤ ਦਬਾਅ, ਦਿਲ ਦੀ ਬਿਮਾਰੀ, ਦਮਾ, ਫੇਫੜਿਆਂ ਦੀ ਦਿਰਘਕਾਲੀਨ ਰੁਕਾਵਟ ਸੰਬੰਧੀ ਬਿਮਾਰੀ (obstructive pulmonary disease), ਗੁਰਦੇ ਦੀ ਬਿਮਾਰੀ ਅਤੇ ਕੁਝ ਲੰਬੇ ਸਮੇਂ ਦੇ ਦਰਦ ਜਾਂ ਮਾਨਸਿਕ ਸਿਹਤ ਸੰਬੰਧੀ ਸਥਿਤੀਆਂ ਸ਼ਾਮਲ ਹਨ।

ਚੱਲ ਰਹੀ ਦੇਖਭਾਲ ਵਿੱਚ ਨਿਯਮਤ ਜੀਪੀ ਸਮੀਖਿਆਵਾਂ, ਨਰਸਿੰਗ ਸਹਾਇਤਾ, ਦਵਾਈਆਂ ਦੀ ਸਮੀਖਿਆ, ਮਾਪ-ਤੋਲ, ਪੈਥੋਲੋਜੀ, ਇਮੇਜਿੰਗ, ਜੀਵਨ-ਸ਼ੈਲੀ ਬਾਰੇ ਚਰਚਾ, ਕਾਰਵਾਈ ਯੋਜਨਾਵਾਂ ਅਤੇ ਮਾਹਿਰਾਂ ਜਾਂ ਸਹਿਯੋਗੀ ਸਿਹਤ ਪੇਸ਼ੇਵਰਾਂ ਨਾਲ ਤਾਲਮੇਲ ਸ਼ਾਮਲ ਹੋ ਸਕਦਾ ਹੈ। ਯੋਗ ਮਰੀਜ਼ ਮੈਡੀਕੇਅਰ ਦੁਆਰਾ ਵਿੱਤ-ਪੋਸ਼ਿਤ ਇੱਕ ਦਿਰਘਕਾਲੀਨ ਬਿਮਾਰੀ ਪ੍ਰਬੰਧਨ ਯੋਜਨਾ ਜਾਂ ਸੰਬੰਧਿਤ ਸੇਵਾਵਾਂ ਪ੍ਰਾਪਤ ਕਰ ਸਕਦੇ ਹਨ। ਯੋਗਤਾ ਅਤੇ ਸਹਾਇਤਾ ਦੀ ਕਿਸਮ, ਮੌਜੂਦਾ ਮੈਡੀਕੇਅਰ ਨਿਯਮਾਂ ਅਤੇ ਮਰੀਜ਼ ਦੀਆਂ ਲੋੜਾਂ ‘ਤੇ ਨਿਰਭਰ ਕਰਦੇ ਹਨ।

ਨਿਰੰਤਰਤਾ ਮਦਦਗਾਰ ਹੋ ਸਕਦੀ ਹੈ। ਜਿੱਥੇ ਸੰਭਵ ਹੋਵੇ, ਉਹੀ ਜੀਪੀ ਜਾਂ ਅਜਿਹੇ ਜੀਪੀਆਂ ਦੇ ਇੱਕ ਛੋਟੇ ਸਮੂਹ ਨਾਲ ਬੁੱਕ ਕਰੋ ਜੋ ਤੁਹਾਡਾ ਇਤਿਹਾਸ ਜਾਣਦੇ ਹਨ। ਜੇ ਲੱਛਣ ਬਦਲ ਜਾਣ ਤਾਂ ਅਗਲੀ ਨਿਯਤ ਮੁਲਾਕਾਤ ਦੀ ਉਡੀਕ ਕਰਨ ਦੀ ਬਜਾਏ ਪਹਿਲਾਂ ਹੀ ਜਾਂਚ ਕਰਵਾਓ।

MyMedicare ਆਸਟ੍ਰੇਲੀਆਈ ਸਰਕਾਰ ਦਾ ਇੱਕ ਸਵੈਛਿਕ ਪ੍ਰੋਗਰਾਮ ਹੈ ਜਿਸ ਨਾਲ ਮਰੀਜ਼ ਇੱਕ ਪਸੰਦੀਦਾ ਜਨਰਲ ਪ੍ਰੈਕਟਿਸ ਨਾਲ ਰਜਿਸਟਰ ਅਤੇ ਇੱਕ ਪਸੰਦੀਦਾ ਜੀਪੀ ਨਿਯੁਕਤ ਕਰ ਸਕਦੇ ਹਨ। ਯੋਗਤਾ ਅਤੇ ਪ੍ਰੋਗਰਾਮ ਦੇ ਮੌਜੂਦਾ ਨਿਯਮਾਂ ਦੇ ਅਧਾਰ ‘ਤੇ, ਰਜਿਸਟ੍ਰੇਸ਼ਨ ਕਰਨ ਨਾਲ ਦੇਖਭਾਲ ਦੀ ਨਿਰੰਤਰਤਾ ਅਤੇ ਕੁਝ ਮੈਡੀਕੇਅਰ ਸੇਵਾਵਾਂ ਤੱਕ ਪਹੁੰਚ ਵਿਚ ਸਹਾਇਤਾ ਮਿਲ ਸਕਦੀ ਹੈ।

ਮੈਡੀਕੇਅਰ ਕਾਰਡ ਜਾਂ ਡਿਪਾਰਟਮੈਂਟ ਆਫ ਵੈਟਰਨਜ਼ ਅਫੇਅਰਜ਼ ਵੈਟਰਨ ਕਾਰਡ ਵਾਲੇ ਮਰੀਜ਼ ਰਿਸੈਪਸ਼ਨ ਤੋਂ KRMC ਵਿੱਚ ਰਜਿਸਟਰ ਕਰਨ ਬਾਰੇ ਪੁੱਛ ਸਕਦੇ ਹਨ। ਰਜਿਸਟ੍ਰੇਸ਼ਨ ਮੈਡੀਕੇਅਰ ਦੇ ਆਨਲਾਈਨ ਖਾਤੇ ਰਾਹੀਂ ਵੀ ਪੂਰੀ ਕੀਤੀ ਜਾ ਸਕਦੀ ਹੈ। ਮਰੀਜ਼ ਰਜਿਸਟਰਡ ਪ੍ਰੈਕਟਿਸ ਵਿੱਚ ਨਾਮਜ਼ਦ ਜੀਪੀ ਨੂੰ ਬਦਲ ਸਕਦਾ ਹੈ, ਪ੍ਰੈਕਟਿਸਾਂ ਬਦਲ ਸਕਦਾ ਹੈ, ਜਾਂ MyMedicare ਵਰਤਣਾ ਬੰਦ ਕਰ ਸਕਦਾ ਹੈ।

ਰਜਿਸਟ੍ਰੇਸ਼ਨ ਮਰੀਜ਼ ਨੂੰ ਕਿਸੇ ਹੋਰ ਪ੍ਰੈਕਟਿਸ ਵਿੱਚ ਜਾਣ ਤੋਂ ਨਹੀਂ ਰੋਕਦੀ। ਇਹ ਅਪਪੋਇੰਟਮੈਂਟ ਦੀ ਉਪਲਬਧਤਾ, ਕਿਸੇ ਵਿਸ਼ੇਸ਼ ਸੇਵਾ ਜਾਂ ਬਲਕ-ਬਿਲਿੰਗ ਦੀ ਗਾਰੰਟੀ ਨਹੀਂ ਦਿੰਦਾ। ਕਿਸੇ ਵਿਸ਼ੇਸ਼ ਲਾਭ ‘ਤੇ ਨਿਰਭਰ ਕਰਨ ਤੋਂ ਪਹਿਲਾਂ, ਮੌਜੂਦਾ ਜਾਣਕਾਰੀ ਲਈ ਰਿਸੈਪਸ਼ਨ ਤੋਂ ਪੁੱਛੋ ਜਾਂ ਸਰਵਿਸਿਜ਼ ਆਸਟ੍ਰੇਲੀਆ ‘ਤੇ ਜਾਓ।